Níels Thibaud Girerd er íslensk-franskur leikari, leikstjóri og fjölmiðlamaður. Hann lauk BA-gráðu í leiklist frá Sviðslistadeild Listaháskóla Íslands árið 2021 og diplómanámi í óperustjórnun á vegum Opera Europa árið 2022.

Frá útskrift hefur Níels tekist á við fjölbreytt hlutverk á sviði, meðal annars Birtíng í Birtíng eftir Voltaire, Peleif í Ástarseyði Bergamólíó Kroppinbaks, Smidda í Jónsmessunæturdraumi, Napóleon í Níels er Napóleon, Benoît í La bohème, Pétur Pan í Pétri Pan, Andreij í Þremur systrum og Hallgrím Pétursson í Jólunum hans Hallgríms. Hann hefur jafnframt komið reglulega fram með Sinfóníuhljómsveit Íslands.

Á árunum 2015–2022 starfaði Níels sem sýningarstjóri, verkefnastjóri og aðstoðarleikstjóri við Íslensku óperuna. Sem leikstjóri hefur hann meðal annars leikstýrt Brothers eftir Daníel Bjarnason, Rabbi Rafmagnsheila, sem tilnefnd var til Íslensku tónlistarverðlaunanna árið 2023, Hrafntinnu og Örlagaþráðum. Meðal annarra leikstjórnarverkefna hans eru Syngjandi í rigningunni, Mary Poppins, West Side Story, Chicago, Íslandsklukkan og Bugsy Malone, samstarfsverkefni Söngleikjadeildar Söngskólans í Reykjavík og Þjóðleikhússins.

Níels hefur starfað við sjónvarp og útvarp frá árinu 2010 og komið að gerð yfir 100 þátta og innslaga fyrir íslenska fjölmiðla. Á árunum 2020–2021 leikstýrði hann Óperuminningu, 18 þátta sjónvarpsþáttaröð sem unnin var í samstarfi Íslensku óperunnar og RÚV. Árið 2025 framleiddi hann og leikstýrði, ásamt Gunnari Smára Jóhannessyni, Níels og Napóleon fyrir Ríkisútvarpið – Rás 1. Hann vinnur nú sem höfundur og framleiðandi að heimildarþáttaröðinni Bravó Wagner fyrir RÚV, sem fjallar um Richard Wagner, Bayreuth-hátíðina og 150 ára sögu hennar.

Níels hefur einnig leikið í sjónvarpi og kvikmyndum, meðal annars í bandarísku kvikmyndinni The Finnish Line, Dagbók lögreglunnar, Krakkaskaupinu, Hæ Gosi og Stundinni okkar, þar sem hann lék á árunum 2021–2024.